Հայաստանի, Երևանի բոլոր փողոցները պարբերաբար շրջափակվելու են: Այս իրավիճակին հանգուցալուծում չկա այնքան ժամանակ, մինչև Նիկոլ Փաշինյանը չհասկանա, որ ինքն ուղղակի պատասխանատուն է ցանկացած վատթարագույն զարգացման: Այս մասին Բաղրամյան պողոտայում լրագրողների հետ զրույցում ասաց ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը:
Նա անդրադարձավ ՀՀ նախագահ Արմեն Սարգսյանի կողմից ԶՈւ ԳՇ պետ Օնիկ Գասպարյանին պաշտոնից ազատելու հրամանագիրը ՍԴ չուղարկելուն՝ նշելով, թե այսօր հանրապետության նախագահը վերածվեց դիտորդից առավել վատ կարգավիճակ ունեցող անձի, ով չկարողացավ իր մեջ գտնել քաղաքական պատասխանատվություն և տղամարդկություն՝ Նիկոլի կամակատարը չդառնալու համար:
«Արմեն Սարգսյանն այս պահից պատասխանատվություն է կրում հանձնված Արցախի, հանձնված Շուշիի և 5000-ից ավել զոհերի համար: Արմեն Սարգսյանը դավաճանության համասեփականատեր է այս պահից, և բոլոր նրանք, ովքեր կսատարեն դավաճանությանը, կդառնան արյան համասեփականատեր, Արմեն Սարգսյանի ձեռքերն այս պահից թաթախված են 5000 զինվորների արյան մեջ»,-հայտարարեց պատգամավորը, ապա հավելեց.
«Մենք լինելու ենք այստեղ, մինչև Նիկոլ Փաշինյանը հասկանա, որ ՀՀ-ն ու Արցախն ունեն մեկ թշնամի, և այդ մեկ թշնամու անունը Նիկոլ է»:
Հիշեցնենք, որ Նիկոլ Փաշինյանի հրաժարականը պահանջող քաղաքացիները «Հայրենիքի փրկության շարժման» վարչապետի թեկնածու Վազգեն Մանուկյանի կոչով շրջափակել են ԱԺ մուտքերը, տեղադրվել են նոր վրաններ:
