Ազգային ժողովի շենքում գտնվող քաղաքական մեծամասնությանը հայտարարում ենք, որ իրենք այլևս հակապետական և հակազգային են և չեն ծառայում Հայաստանի Հանրապետության ժողովրդին շահերին. դիմելով Նիկոլ Փաշինյանի հրաժարականը պահանջող քաղաքացիներին՝ ասաց ՀՅԴ անդամ Իշխան Սաղաթելյանը:
«Այս Խորհրդարանի շենք այլևս քաղաքական մեծամասնությունը պետք է մտնի միայն մեր ուզած ու թելադրած օրակարգով, այս քաղաքական մեծամասնությունը այլևս անելիք չունի, թող գնա թուրքական Միլլի մեջլիսում շարունակի իր գործունեությունը»,- ընդգծեց նա:
Նշենք, որ քաղաքացիները շրջափակել են Ազգային ժողովի շենքը, այս պահին նրանք Դեմիրճյանի փողոցում են հավաքված:
«Հարգելի՛ ոստիկաններ, մեր սիրտը չի փառավորվում ձեզանից մահակներ խլելու համար, ի տարբերություն գերագույն գլխավոր դավաճանի, ով 12 տարի առաջ սպանդ սարքեց մեր քաղաքում, մենք ձեզ հետ հարց չունենք, սադրանքների չգնաք մենք շարունակելու ենք մեր բողոքի անհնազանդության ակցիան, այս խորհրդարան այլևս պետք է պատգամավոր չմտնի: Ոստիկանները կոչ էին անում, որ ապօրինի է ձեր գործունեությունը, տղերք, որ Նիկոլը վարչապետ եղած հալով շենքեր էր շրջափակում, ինչի՞ չէիք գնում պաշտպանելու այդ դատարանները, օրենքը: Դուք այսօր ունեք մի առաքելություն՝ կանգնել ժողովրդի ու բանակի կողքին, այդ բանակը ոչ միայն մերն է, այլ նաև ձերն է»,- հայտարարեց նա:
Իշխան Սաղաթելյանը, դիմելով ցուցարարներին, ասաց, որ պետք է ցույց տալ, որ բանակի կողքին են. «Հարգելի հայրենակիցներ, եթե ՀՀ նախագահը չի պաշտպանում Սահմանադրություն, եթե ՀՀ վարչապետը շարունակում է տապալել երկրի սահմանադրական կարգը, ուրեմն ժողովուրդը պետք է պաշտպանի սահմանադրությունը, մենք պետք է թույլ չտանք, որ մեկ անգամ ևս նիկոլը տապալի Սահմանադրությունը և Սահմանադրական կարգը»: