Գերմանիայի հյուսիս-արևմուտքում գտնվող Հանովեր շրջանի Ստայնհուդա լճի ափին գտնվող Վիլհելմշտեյն կղզին կատարյալ վայր է կորոնավիրուսային համավարակի ընթացքում լիովին մեկուսանալու համար, գրում է odditycentral.com-ը:
Վիլհելմշտեյն կղզու պատմությունը սկսվել է 1761 թ.-ին, երբ Շաումբուրգ-Լիպպե-Բյուրկեբուրգի շրջանի ղեկավար և կոմս Վիլհելմ ֆոն Շաումբուրգ-Լիփեն հրամայել էր բերդ կառուցել Գերմանիայի հյուսիսում գտնվող ամենամեծ լճի՝ Շտայնհուդ Մեերի վրա:
Ռազմական պաշտպանական համալիրն ի սկզբանե բաղկացած էր 16 կղզիներից, որոնք կառուցված էին քարերից, որոնք տեղացի ձկնորսները իրենց նավակներով տեղափոխել էին լճի կենտրոնական հատվածը: Կղզու մեջտեղում կառուցվել է աստղաձև ամրոց, իսկ ավելի ուշ՝ ռազմական քոլեջ, որը նախատեսված է հաջորդ սերնդի առաջնորդներ պատրաստելու համար:
Այնուամենայնիվ, որպես ամրոց Վիլհելմշտեյն կղզին օգտագործվել է միայն մեկ անգամ ՝ 1787 թվականին Հեսսիայի պաշարման ժամանակ: Դրանցի հետո այն վերածվել էր պետական բանտի, որտեղից փախչելն ուղղակի անհնար էր:
Արդեն 19-րդ դարի սկզբին 16 ինքնատիպ կղզիները միաձուլվել էին մեկ ուղղանկյուն ձև ունեցող կղզու մեջ՝ ավելացնելով դրա տարածությունը և օգնելով կղզուն ավելի լավ դիմակայել բնական աղետներին:
Որոշ ժամանակ անց՝ 1867 թ.-ին, բոլոր բանտարկյալները տեղափոխվել էին երկրի այլ բանտեր, որից հետո էլ սկսվել է Վիլհելմշտեյն կղզու «վերածնունդը»՝ որպես զբոսաշրջային գրավչություն: Ընդամենը մի քանի տասնամյակների ընթացքում արհեստական կղզին վերածվել է այցելուների համար սիրված վայրի: 1900-ից կղզում կազմակերպվել են առաջին հարսանիքները:
Նույնիսկ այն բանից հետո, երբ Վիլհելմ ֆոն Շաումբուրգ-Լիփեի հետնորդները 1974 թ.-ին Շտայնհուդա լիճը վաճառել էին Հանովերին օտարումից խուսափելու համար, Վիլհելմշտեյն կղզին շարունակում է մնալ Շաումբուրգ-Լիփե ընտանիքի սեփականությունը և ներկայում կառավարվում է կղզու կարգադրիչի կողմից:
Այսօր Վիլհելմշտեյն կղզին շարունակում է մնալ ամենագեղեցիկ տեսարժան վայրերից մեկն ամբողջ Գերմանիայում: Նավակով դրան հասնելուց հետո զբոսաշրջիկները կարող են այցելել թանգարանի վերածված հին ամրոց, շրջել կղզով կամ պարզապես վայելել գեղեցիկ տեսարանը:
Կղզում նույնիսկ կարելի է գիշերել, եթե նախատեսում եք այնտեղ մեկ օրից ավելի անցկացնել:
