Գերմանիայում իշխող կոալիցիան համաձայնության է եկել «ռասա» բառը երկրի սահմանադրությունից հեռացնելու շուրջ: Այս մասին հայտնում է Известия-ն՝ հղում տալով Spiegel պարբերականին:
Երկրի հիմնական օրենքի ներկա տարբերակում կա մի կետ, որն արգելում է խտրականությունը «սեռի, ծագման, ռասայի, լեզվի, հայրենիքի և ծննդյան վայրի, հավատքի, կրոնական և քաղաքական հայացքների, ինչպես նաև հաշմանդամության հիմքով»: Առաջարկվում է, որ «ռասա» բառը փոխարինվի «ռասիստական հիմքերով» բառակապակցությամբ:
Նախաձեռնությունը քննադատողների կարծիքով ՝ իշխանություններն այսպիսով արմատախիլ չեն անում ռասաների իրական գոյության գաղափարը: Նրանք այս հարցում ավելի ծայրահեղ փոփոխություններ են պահանջում իրականացնել սահմանադրության մեջ:
Այն փաստը, որ երկրի կառավարությունը քննարկում է «ռասա» բառը սահմանադրությունից հանելու հնարավորությունը, հաղորդվել է 2020-ի նոյեմբերին: Ըստ ԳԴՀ արդարադատության նախարար Քրիստին Լամբրեխտի, նախարարների կաբինետը դա բացատրում է նրանով, որ «ռասայի» բուն գաղափարը այսօր համարվում է հիմնազուրկ»: