Այսօր Ազգային ժողով – Կառավարություն հարցուպատասխանի ժամանակ «Լուսավոր Հայաստան» խմբակցության պատգամավոր Անի Սամսոնյանը հետաքրքրվեց Երևան համայնքի տրանսպորտային խնդրի լուծման գործընթացից։
Պատգամավորը հիշեցրեց, որ ապրիլի 28-ին Վերակառուցման և զարգացման եվրոպական բանկը (ՎԶԵԲ) իր պաշտոնական էջում հրապարակել է Երևան համայնքի կողմից գնման մրցույթը` թվով մոտ 100 ավտոբուսների։
«Այդ 100 ավտոբուսները գնելու համար անհրաժեշտ է 25 մլն եվրոյի չափով գումար և այդ գնումը իրականացվելու է վարկային միջոցներով։ Տեղյակ ենք նաև, որ Երևան համայնքը դիմել է Կառավարությանը, որպեսզի վերջինս հաստատի վարկային հայտը։ Արդյո՞ք կառավարությունը հաստատել է այդ վարկային հայտը և ինչ ժամկետներում է կնքվելու այդ վարկային պայմանագիրը։ Ենթադրում եմ, որ այն վարկերի ստացման ընթացակարգերով պետք է անցներ, քննարկվեր Ազգային ժողովում, քվեարկվեր, որ հաստատվեր 25 մլն եվրոյի վարկ։ Ստացվում է՝ այս պահին փողը չկա, բայց հայտարարվել է մրցույթ»,- նշեց Անի Սամսոնյանը։
Ի պատասխան պատգամավորի բարձրացրած հարցի, փոխվարչապետ Տիգրան Ավինյանը հայտնեց, որ ավտոբուսների ձեռքբերման գործընթացը մրցույթի փուլում է։
«Նախկինում նշել ենք, որ Երևան համայնքի տրանսպորտային խնդրի շուտափույթ և որակյալ լուծումը մեզ համար առաջնահերթություն է և Կառավարությունը պատրաստակամ է իր ուժերի ներածին չափով աջակցել համայնքին այս խնդրի լուծման համար։ Ձեր մատնանշած մրցույթը նաև բխում է համայնքին աջակցելու Կառավարության պատրաստակամությունից, ինչպես նաև ՎԶԵԲ-ի կողմից նաև որոշակի ճկուն ընթացակարգերի առաջարկով մենք արագացված ռեժիմով արդեն անցել ենք մրցութային փուլին»,- ասաց Տիգրան Ավինյանը։
Ինչ վերաբերում է ԱԺ-ի կողմից վարկերի հաստատմանը, փոխվարչապետը նշեց․ «Որոնք ԱԺ-ի հաստատման կարիքն ունեն, անպայմանորեն կհաստատվեն ԱԺ-ի կողմից, որոնք Կառավարության լիազորությունների շրջանակում են, կլուծվեն Կառավարության մակարդակում»։