Ես ուզում եմ հասկանալ խստացումների պատճառը ո՞րն է, որ մուտքի մոտ պետք է դիմակ և ձեռնոց ստանանք: Այս մասին այսօր Ազգային ժողովում ԱԺ նախագահ Արարատ Միրզոյանին հարցրեց «Լուսավոր Հայաստան» խմբակցության ղեկավար Էդմոն Մարուքյանը:
«Եթե մարդ կա հիվանդ, ասենք, թող չգան, իմանանք՝ ինչ ենք անում, կամ բոլորս գնանք, թեստ հանձնենք: Անհասկանալի վիճակ է»,-ասաց պատգամավորը:
Արարատ Միրզոյանն էլ ի պատասխան հարցին՝ նշեց. «Աշխարհում կա մի նոր համաճարակ՝ կորոնավիրուսով պայմանավորված, և այնպես է ստացվել, որ ասում են, որ ձեռնոցները և դիմակները հավանականության որոշակի տոկոսով կարող են կանխել վարակի տարածումը: Հիմա ոչ մեկին ոչինչ չի պարտադրվում, դահլիճի մոտ առաջարկվում է կրել դիմակ և ձեռնոց, որը կարող եք չկրել»,-ասաց նա:
ԱԺ նախագահը նշեց, որ կա հիմնավոր կասկած, որ ԱԺ աշխատակիցներից մեկը կոնտակտավոր անձ է և քանի դեռ հանգամանքները չեն պարզվել, մի քիչ ավելի խստացված կերպով ենք կիրառում կանխարգելիչ աշխատանքները: «Ես վաղուց արդեն ասել եմ, որ բոլոր այն պատգամավորները, որոնք մտահոգություն կունենան և կնախընտրեն չմասնակցել նիստերի, պատգամավորների բացակայությունը կհամարվի հարգելի»,-ասաց նա և ավելացրեց, որ այս վիճակը կարող է երկար տևել և իրենք չեն պառալիզացնելու երկրի օրենսդիր մարմնի գործունեությունը:
Էդմոն Մարուքյանը արձագանքեց, որ լուրջ հարց է տալիս, իսկ ԱԺ նախագահը կատակ է անում: «Մեզ դռան մոտ թույլ չէին տալիս առանց դրա ներս գալ, կորոնավիրուսի մասին բոլորս գիտենք»,-ասաց նա:
«Ես լուրջ էի պատասխանում, ձեզ ոչ մեկ չի կարող պարտադրել ձեռնոց կրել, կամ ինչպես ոչ մեկ չի կարող պարտադրել ճանապարհ անցնել կանաչ լույսով, յուրաքանչյուրը ինքն է որոշում»,-հավելեց Արարատ Միրզոյանը:
