Հոլիվուդյան դերասանուհի Անջելինա Ջոլին ԱՄՆ բարձրաստիճան քաղաքական գործիչներին կոչ է արել օգնել կորոնավիրուսի համավարակի ֆոնին ծանր դրության մեջ հայտնված և սնունդ հայթայթել փորձող ընտանիքներին, գրում է Daily Mail-ը։
Կոնգրեսի Ներկայացուցիչների պալատի խոսնակ Նենսի Փելոսիին, Ներկայացուցիչների պալատի փոքրամասնության առաջնորդ Քևին ՄաքՔարթիին, Սենատի մեծամասնության առաջնորդ Միթչ ՄաքՔոնելին և Սենատի փոքրամասնության առաջնորդ Չակ Շումերին ուղղված նամակում դերասանուհին, մասնավորապես, գրել է․ «Ամերիկայի ամենախոցելի խմբի երեխաներից շատերը կորոնավիրուսի զսպման շրջանակում դպրոցների փակման հետևանքով զրկվել են 740 մլն չափաբաժին ճաշից, որը ստանում էին դպրոց հաճախելու արդյունքում։ Քանի որ նրանց ծնողներից շատերը կանգնած են աշխատանքի և աշխատավարձի կորստի շեմին, այդ երեխաները քաղցած կմնան»։
Ավելի վաղ Անջելինա Ջոլին 1 մլն դոլար էր նվիրաբերել «Ոչ մի սոված երեխա» (No Kid Hungry) բարեգործական կազմակերպությանը, որը սննդով է ապահովում կորոնավիրուսի համավարակի ֆոնին դպրոցների փակման պատճառով քաղցած մնացած երեխաներին։
Վերջին տվյալներով՝ ԱՄՆ-ում արձնագրվել է կորոնավիրուսի 1 237 633 դեպք, որից 72 271-ը՝ մահվան ելքով։
