Այսօր մենք պետք է համատեղ ջանքերով մասնակցենք օրենսդրության մշակմանը, որը արտացոլելու է մեր հասարակության բանականության ձայնը, որը համապատասխանում է հասարակության ակնկալիքներին: Այս մասին այսօր Դատական օրենսգրքում փոփոխությունների թեմայով ԱԺ լսումների ժամանակ այսօր ասաց ՀՀ ԱԺ պետական-իրավական հարցերի մշտական հանձնաժողովի նախագահ Վլադիմիր Վարդանյանը։
Նա նշեց, որ դատաիրավական բարեփոխումներն անվերջ գործընթաց են, և այդ համակարգն անընդհատ պետք է կատարելագործվի: «Դատաիրավական բարեփոխումները նոր Հայաստանի զարգացման կարևորագույն հանգրվաններից մեկն են: Դատական իշխանությունն իրավական պետության ստեղծման, կայացման հիմքն է, առանց դատական իշխանության մենք չենք կարող երաշխավորել մարդու իրավունքների պաշտպանությունը»,-ասաց նա:
Վլադիմիր Վարդանյանը համաձայնեց, որ դատական համակարգում ունենք համակարգային խնդիրներ։ «Դատավորների աշխատանքը տաժանակիր է, սակայն պետք է ասել, որ դատական համակարգում անբասիր դատավորները մեծ մաս են կազմում: Նապոլեոն Բոնապարտն ասել է՝ դատավորները հանրային կարգի պահապաններն են։ Եվ իսկապես, նրանք պետք է արժանանան ամենալայն վստահության, բայց նաև պարտավոր են ամեն օր իրականացել օրենքի վրա հիմնված արդարադատություն», -ասաց նա:
Վլադիմիր Վարդանյանը նշեց, որ ՀՀ-ի համար ժողովրդավարությունը այլընտրանք չունի: «Իսկ ժողովրդավարություն առանց իրավական պետության պատկերացնել հնարավոր չէ, իրավական պետություն առանց իրավունքի գերակայության պատկերացնել անհնար է»,-հավելեց նա:
