عبدالله عبدالله رئیس اجرائیه افغانستان امروز در سخنرانی‌اش در اجلاس سازمان همکاری شانگهای، در شهر تاشکند پایتخت ازبیکستان گفت که منطقه به یک استراتیژی موثر در راستای مبارزه با تروریزم نیاز دارد.
عبدالله افزود:" تداوم و گسترش همکاری‌های مشترک کشورهای منطقه و جهان در مبارزه با پدیدۀ شوم تروریزم و مقابله با تهدیدهای برخاسته از آن نیاز مشترک‌ما است."
عبدالله گفت که افغانستان مبارزه با تروریزم را به همکاری کشورهای منطقه و دوستان بین‌المللی‌اش با هزینه‌های هنگفت مالی و جانی به پیش می‌برد.
مقام‌های نظامی امریکا بارها گفته اند که بیش از ۲۰ گروه تروریستی در افغانستان و پاکستان حضور دارند.
سازمان همکاری شانگهای در سال ۲۰۰۱ میلادی ایجاد شد.
روسیه، چین، قزاقستان، قیرغزستان، تاجیکستان، ازبیکستان، هند و پاکستان کشورهای عضو این سازمان هستند.
افغانستان، ایران، بلاروس و منگولیا اعضای ناظر سازمان همکاری شانگهای اند.
