ABŞ Prezidenti Donald Trump deyir ki, ölkənin əks-kəşfiyyat xidmətinin rəhbərinin müvəqəqəti olaraq milli kəşfiyyatın direktoru vəzifəsini icra etməsini istəyir.
Avqustun 8-də yazdığı tvitində Trump bildirib ki, Milli Əks-kəşfiyyat Mərkəzinin direktoru Joseph Maguire avqustun 15-dən milli kəşfiyyatın başına keçəcək.
Maguire ABŞ Donanmasının vitse-admiralı olub, 2010-cu ildə təqaüdə çıxıb. 2018-ci ildə isə Trump tərəfindən əks-kəşfiyyata rəhbərliyə namizədliyi verilib və bu posta təyin olunub.
Maguire Dan Coats-ı əvəzləyəcək. O, ötən ay bildirib ki, avqustun 15-də istefa verəcək. Maquire-nin Milli Kəşfiyyatın direktoru vəzifəsinə təsdiqlənəcəyi bəlli deyil.
Trump Twitter-də onu da yazıb ki, Coats-ın müavini Sue Gordon istefa verir. Kəşfiyyatçı karyerasına malik Gordon-un direktor postuna keçməsini bir çox indiki və keçmiş rəsmilər dəstəkləyirdi.