Mayın 9-da Monteneqro məhkəməsi 2016-cı ilin oktyabrında hökuməti zorakılıqla devirməyi planlaşdırmaqda suçlanan 14 nəfərə hökm oxuyacaq.
Monteneqro hakimiyyətinin bildirməsinə görə, Serbiya və Rusiya millətçiləri parlament seçkisi vaxtı parlamenti tutmağı, ovaxtkı baş nazir Milo Djukanovic-i qətlə yetirməyi, rusiyapərəst hakimiyyət qurmağı planlaşdırıblar.
Təqsirləndirilənlərdən doqquzu Serbiyadan, üçü Monteneqrodan, ikisi Rusiyadandır. Rusiyalılar qiyabi mühakimə olunublar.
Təqsirləndirilənlər Monteneqronun konstitusiya quruluşuna zərbə vurmaq məqsədilə kriminal təşkilat yaratmaqda ittiham olunublar. Rusiyalılara həm də terrorçuluq ittihamı irəli sürülüb.
Həmin iki rusiyalının Rusiya hərbi kəşfiyyatının (GRU) zabitləri olduğu iddia olunur. Onların bu kiçik Balkan ölkəsinin NATO-ya girməsini önləməkdən ötrü belə bir ssenari təşkil etdiyi bildirilir.
Kreml isə “Rusiya dövlət orqanlarıın” iddia olunan çevriliş cəhdində əli olmasına dair iddiaları rədd edib.
Monteneqro 2017-ci ilin iyununda NATO-nun 29-cu üzvünə çevrilib. Rusiya bu addımı tənqid edib. Moskvayla daha sıx münasibətlər tərəfdarı olan bəzi monteneqrolular da bu addıma qarşı çıxıblar.
