Dünən mayın 8-də Xəzər dənizində "İsrafil Hüseynov” gəmisində yanğın baş verib.
Bu barədə Fövqəladə Hallar Nazirliyi məlumat yayıb.
Məlumatda bildirilir ki, Xəzər dənizində "İsrafil Hüseynov” gəmisində yanğın baş verib, yanğını gəmi heyəti söndürüb.
Nazirlik əlavə məlumat veriləcəyini qeyd edir.
“Turan” agentliyi isə xəbər verir ki, mayın 8-də axşam saatlarında baş vermiş yanğın nəticəsində "İsrafil Hüseynov" borudüzən gəmisində 14 nəfər xəsarət alıb.
Agentlik bu barədə hal-hazırda Xəzər dənizində gəmini istismar edən "Saipem" şirkətindəki bir mənbəyə istinad edib.
Müxtəlif dərəcədə yanıq xəsərəti alanların başqa bir gəmi ilə Bakıya yola salındığı bildirilir.
“Qafqazinfo” saytında isə yaralıların sayı 13 göstərilir. Saytın xəbərinə görə, onlardan 3-nün vəziyyəti ağırdır.
Xəbərdə qeyd olunur ki, yaralıların əvvəlcə Heydər Əliyev adına Bakı Dərin Özüllər Zavoduna gətirilməsi planlaşdırılsa da, vəziyyətlərinin ağırlığı nəzərə alınaraq Bakı Dəniz Vağzalına aparılıblar.
