Югары Тегермәнлек укучысы - бердәнбер иде
Дөнья җәмәгатьчелеге патриот шагыйрь Муса Җәлилнең тууына 110 еллыгын югары сәнгати, сәяси дәрәҗәдә билгеләп үтте.
Шуның матур мисалы булып Татарстан Республикасы мәдәният министрлыгы, Казан дәүләт федераль университеты, Милли музей тарафыннан оештырылган Халыкара фәнни конференция үткәрелү булгандыр.Ул “Муса Җәлил: тормышы һәм иҗатына XXI гасыр кыйммәтләре югарылыгыннан караш” дигән темага нигезләнгән иде. Шунысы куанычлы, Муса Җәлилнең кызы Чулпан Җәлилова, Германия, Көнчыгыш Европа илләре галимнәре һәм йөз сиксән галим, белгечләр каршында Югары Тегермәнлек урта мәктәбенең 11нче сыйныф укучысы Илвена Кәримова һәм Татарстанның атказанган укытучысы Рамазан Кәбиров эчтәлекле чыгышлар ясап, катнашучыларның хуплавына, оештыручыларның Рәхмәт хатларына лаек булдылар.Шунысын да әйтергә кирәк: Халыкара конференциядә чыгыш ясаучы бердәнбер укучы булу бәхете республика буенча Илвенага гына елмайды.
Фотосы :dailyculture.ru