Язгы каникулда Зәй туган як тарихын өйрәнү музее хезмәткәрләре традиция буенча мәктәпләрдә “Музей көннәре” уздыра. 21 мартта әлеге чара 3нче мәкәп укучылары өчен үткәрелде. Ул фронтовик, якташыбыз Михаил Голов истәлегенә багышланган иде. Михаил Александрович истәлекле рәсемнәр, скульптуралар, төрле документаль материаллар җыеп калдырган. Ул тумышы белән Воронеж өлкәсеннән. Армия хезмәтен Кавказда узган, Бөек Ватан сугышында 223нче Белгород дивизиясе составында Төньяк Кавказ, Донбасс, Украинаны азат итүдә катнашкан. Сугыштан ул Зәйгә майор чинында кайта. 1946 елдан хәрби комиссариатны җитәкли. Урау юллар аша, Мәскәү иҗат йортының рәссамнар бүлеген тәмамлый: рәсемнәр ясый, скульптуралар иҗат итә.