Гөлсирин Абдуллина кияүгә чыга?
Татарстан районнарында Гөлсирин Абдуллинаның гастрольләре гөрли.
«Гөлсирингә - өч кияү!» дип исемләнгән яңа программада җырчының йөрәген яулау өчен өч егет көч сынаша: горур мишәр егете Азат Абитов, Сембердән килгән моң иясе Рәнис Габбазов һәм хыялый, чибәр егет Артур Шогаепов.
– Егетләрнең өчесе дә уңган-булган, берсенә дә тиңнәр юк. Тамашачы да яратты үзләрен, аягүрә басып алкышлый. Шулай да кайбер тамашачылар үз кандидатларын тәкъдим итә. Кемдер Ришат Төхвәтуллинны, кемдер Радик Юльякшинны миңа тиң күрә, хәтта «Раяз Фасыйховка чык!» диючеләр дә бар. Чаллыда да, Алабугада да мондый тәкъдимнәр белән хатлар яздылар. Мин инде шаяртып: «Өч кенә егет җитмимени? Ә Раяз Фасыйхов өйләнгән бит инде!» дим, – дип сөйли Гөлсирин Абдуллина үзе.
Җырчының әлегә чынлап гашыйк булганы, ярату хисләре кичергәне юк икән.
Интертат.ру