Қырғызстанда Қамшыбек Тәшиевтің бұрынғы орынбасары ұсталды
Қырғызстанда Ұлттық қауіпсіздік мемлекеттік комитеті төрағасының бұрынғы орынбасары ұсталды, деп хабарлайды Tengrinews.kz қырғызстандық БАҚ-қа сілтеме жасап.
Күш құрылымдарындағы дереккөздердің 24.kg басылымына берген мәліметінше, 12 сәуірде Қырғызстан МҰҚК басшысының орынбасары Даниель Рысалиев қылмыстық істі тергеу аясында жауап алу үшін ІІМ тергеу басқармасына жеткізілді. Ресми органдар әзірге істің қай бап бойынша қозғалғанын және оның қандай мәртебеде екенін хабарлаған жоқ.
Өз кезегінде Kaktus.media дереккөздерге сілтеме жасап, Рысалиевпен бірге Ыстықкөл облыстық 6-шы басқармасының бұрынғы бастығы мен МҰҚК орталық аппаратының қазіргі қызметкері ұсталғанын хабарлаған. Алдын ала мәліметтер бойынша, олар бопсалауға шағымданған кәсіпкердің арызына байланысты "Сыбайлас жемқорлық" бабы бойынша күдікке ілінген.
Даниель Рысалиев 2025 жылдың желтоқсанынан бастап МҰҚК басшысының орынбасары қызметін атқарып, киберқауіпсіздік мәселелеріне жетекшілік еткен. Оған дейін арнайы қызмет жүйесінде жұмыс істеген, соның ішінде өңірлердегі бөлімшелерді басқарған.
2026 жылғы ақпан айының басында МҰҚК-дағы кадрлық ауыс-түйістер аясында қызметінен босатылды.
Мән-жай
10 ақпанда Қырғызстан президенті Садыр Жапаров өзінің досы әрі серіктесі Қамшыбек Тәшиевті барлық лауазымынан босатты. Қырғызстан басшысының баспасөз қызметі мәліметінше, "бұл қадамның басты мақсаты - мемлекет бірлігін нығайту және қоғамдағы, соның ішінде мемлекеттік құрылымдар арасындағы іріткіге жол бермеу". Бұл оқиға Қырғызстан президентіне мерзімінен бұрын сайлау өткізу туралы өтініш жасалған тұста болды. Жапаровтың баспасөз хатшысының айтуынша, Тәшиевтің жақын ортасындағы адамдар депутаттарға қоңырау шалып, оларды "генералдың жағына шығуға" және "президенттің жаңа сайлауын бастауға" үгіттеген.
Ташиевтің отставкасынан кейін күштік блок қайта құрылымдалды: оның орынбасарлары қызметінен айырылды, Шекара қызметі МҰҚК құрылымынан шығарылды, сондай-ақ тікелей президентке бағынатын жаңа Мемлекеттік күзет қызметі құрылды.