Дрондаги сирли ёзув ҳаммани ҳайратга солди
Яқин Шарқдаги кескин вазият фонида Эрон томонидан ишлатилган дронлардан бирига ёзилган ғалати ва рамзий матн жамоатчилик эътиборини торта бошлади.
Маълум қилинишича, “Шаҳед-136” туридаги учувчисиз аппарат корпусида “Мен, Шаҳед-136, Эрон халқи номидан музокаралар учун Тел-Авивга кетяпман”, деган ёзув қайд этилган. Бу каби ёзувлар одатда ахборот-психологик таъсир воситаси сифатида баҳоланмоқда.
Мутахассислар фикрича, бундай хабарлар орқали Исроил ва халқаро ҳамжамиятга маълум сигнал юбориш мақсад қилинган бўлиши мумкин. Яъни, бу нафақат ҳарбий, балки ахборот уруши элементларидан бири сифатида қаралмоқда.
Шу билан бирга, бу каби ёзувлар вазиятнинг қай даражада кескинлашганини ва томонлар ўртасидаги қарама-қаршилик фақат жанг майдонида эмас, балки рамзий ва психологик майдонда ҳам давом этаётганини кўрсатади.