Эрон можароси фонида рекорд нефт захиралари чиқарилиши режалаштирилмоқда
Халқаро энергетика агентлиги миллий фавқулодда захиралардан 400 миллион баррель хом нефтни бозорга чиқариш бўйича тарихий қарорни эълон қилди. 32 аъзо давлатнинг бу қадами Эрондаги давом этаётган можаро ва бунинг натижасида жаҳон энергия нархларининг кескин ошишига жавобан амалга оширилмоқда. Бу ҳақда Tengrinews.kz хабар беради.
11 март куни Парижда бўлиб ўтган навбатдан ташқари йиғилишдан сўнг, ХЭА ижрочи директори Фотиҳ Бирол нефть бозоридаги жорий муаммолар мисли кўрилмаган эканлигини таъкидлади. У глобал узилишлар бозор барқарорлигини таъминлаш учун ягона глобал жавобни талаб қилишини алоҳида қайд этди.
Ушбу қарор дунё нефть савдосининг қарийб 20 фоизи учун муҳим йўналиш бўлган Ҳурмуз бўғозининг қамал қилинишидан жиддий зарар кўрган бозорларни тинчлантиришга қаратилган. Яқинда нефть нархи 2022 йилдан бери биринчи марта 100 долларлик кўрсаткичдан ошиб кетди. Жаҳон бозоридаги босимни янада юмшатиш мақсадида Қўшма Штатлар Ҳиндистонга Россия нефтини сотиб олиш учун вақтинчалик рухсат берди.
ХЭАга аъзо давлатлар, жумладан Катта еттилик мамлакатлари, ҳозирда 1,2 миллиард баррелдан ортиқ стратегик захираларга, шунингдек, 600 миллион баррель саноат захираларига эга. Агентлик 1974 йилда ташкил этилганидан бери фавқулодда нефть захираларидан илгари фақат беш марта фойдаланилган бўлиб, бу унинг тарихидаги энг йирик мувофиқлаштирилган чиқарилишдир.