Трамп Эрон раҳбариятини белгилаш жараёнига аралашмоқчи
АҚШ президенти Дональд Трамп Эроннинг янги олий раҳбарини танлаш жараёнида ўз ўрнига эга бўлишни истаётганини маълум қилди. Бу баёнот Вашингтоннинг минтақадаги ҳарбий мақсадлари борасидаги хавотирларни янада кучайтирди. Али Хоманаий вафотидан сўнг, Эрон диний раҳбарияти янги номзод борасида қарор қабул қилиш арафасида турибди. Хоманаийнинг ўғли ҳам ушбу лавозимга даъвогарлар қаторида тилга олинмоқда. Бу ҳақда semafor.com хабар беради.
Трамп Ахиос нашрига берган интервьюсида мазкур жараёнга аралашиш ниятида эканлигини таъкидлади. У Венесуэла мисолида бўлгани каби, Эрон раҳбариятини шакллантиришда ҳам иштирок этиши кераклигини айтди. Бироқ таҳлилчилар Теҳроннинг мафкуравий тузуми ҳамда Каракасдаги ҳукумат модели ўртасида катта фарқлар борлигини эслатиб ўтишмоқда.
Президентнинг бу сўзлари АҚШ расмийлари томонидан илгари сурилган "биз Эрон режимини ўзгартиришни мақсад қилмаганмиз" деган баёнотларга зид келади. Собиқ америкалик дипломатларнинг фикрича, агар Вашингтон ҳақиқатан ҳам режимни ўзгартиришга урингудек бўлса, бу аввалги уринишлардаги каби қимматга тушадиган тартибсизликларга олиб келиши мумкин.