Галатасарой ва Фенербахче футболчилари ставка можароси сабаб қамалиши мумкин
Галатасарой ва Фенербахче сафида тўп сураётган икки футболчи тикишлар билан боғлиқ иш бўйича қамоқ жазоси хавфи остида қолди. Бу ҳақда euro-football.ru хабар беради.
Гап Галатасарой вакили Метехан Балтаджи ҳамда Фенербахче сардори Мерт Ҳакан Яндаш ҳақида кетмоқда. Маҳаллий ОАВ маълумотларига кўра, Балтаджига 13 йилгача, Яндашга эса 17 йилгача озодликдан маҳрум этиш жазоси таҳдид солмоқда.
Sabah нашри ёзишича, Балтаджи камида икки марта Галатасарой ўйинларига пул тиккан. У ўша баҳсларда асосий таркибда бўлмаган, бироқ жамоа қайдномасига киритилгани сабабли учрашув жараёнига маълум даражада таъсир ўтказиш имкониятига эга экани қайд этилмоқда.
Амалдаги Туркия қонунчилигига кўра, футболчи букмеккерларга ўзининг профессионал спортчи эканини маълум қилиши шарт бўлган, аммо у буни бажармагани айтилмоқда.