Энфилддаги ҳуштакларга Марк Гехи қандай жавоб қайтарди?

АПЛнинг 25-турида «Манчестер Сити» сафарда амалдаги чемпион «Ливерпул»ни 2:1 ҳисобида енгиб, чемпионлик пойгасидаги интригаларни янада қизитди. Аммо «Энфилд»даги кечанинг энг қизиқ нуқталаридан бири голлар эмас, балки трибунадаги реакция бўлди: мезбонлар мухлислари "Манчестер Сити" ҳимоячиси Марк Гехи тўпга эгалик қилган ҳар сафар уни ҳуштаклар билан “кутиб олди”.

Бу вазиятнинг илдизи эса анча олдинга бориб тақалади. Ўтган ёзда "Ливерпул" 25 ёшли ҳимоячи учун "Кристал Пэлас"га 35 миллион фунтдан юқори таклиф юборган, аммо келишув амалга ошмаган. Қишки трансфер ойнасида эса шартномаси 30 июнгача мўлжалланган инглиз футболчиси 20 миллион фунт ва бонуслар эвазига «Сити» сафига кўчиб ўтди. Шу фон ҳам трибуналар кайфиятига таъсир қилгани сезилди.

Ўйиндан кейин Гехи бу эпизодга хотиржам, ҳатто юмор билан муносабат билдирди:

“Ростини айтсам, нима сабабдан эканини билмайман (кулади). Лекин уларнинг мухлислари мен ҳақимда нима деб ўйлашини назорат қила олмайман. Мен фақат ўз мухлисларимизга раҳмат айтаман — улар бутун ўйин давомида мени қўллаб-қувватлашди”, — деди ҳимоячи.

Гехи фикрини давом эттирар экан, бу каби муҳитда ўйнашнинг энг асосий калити руҳий барқарорлик эканини таъкидлади. Унинг айтишича, бундай стадионда босим доим бўлади — айниқса юқори прессинг қиладиган жамоага қарши ўйнаётган пайтда. Лекин ҳал қилувчи нарса — хатога йўл қўйсанг ҳам, кейинги ҳаракатда ўзингни қандай тутишинг.

“Хато бўлиши мумкин. Лекин муҳим жиҳат — кейин нима қиласан. Доимо навбатдаги ҳаракатга, жамоадошларингга қандай фойда келтиришингга эътибор беришинг керак”, — дея қўшимча қилди у.

Қисқаси, «Энфилд»да ҳуштаклар кўп бўлди, лекин Гехи учун бу “психологик тест”дек кечди — ва у ундан имтиҳондан ўтгандай, хотиржам чиқди. Энди эса асосийси шу: бу хислатни кейинги муҳим ўйинларда ҳам сақлаб қолиш.