«Интер» «Торино»ни мағлуб этиб, яримфиналга йўл олди (видео)
Италия Кубоги чоракфиналида “Интер” ўз майдонида “Торино”ни қабул қилди ва мухлисларга драмали, тезкор ҳамда жанговор ўйин тақдим этди. Кристиан Киву бошчилигидаги “нерадзуррилар” 2:1 ҳисобида ғалаба қозониб, яримфиналга йўлланмани қўлга киритди.
Учрашувнинг биринчи бўлимида майдон эгалари ташаббусни қўлга олган ҳолда ҳужумларни кўпайтирди. Натижа ҳам узоқ куттирмади: 35-дақиқада Бонни ҳисобни очди ва “Интер”ни олдинга олиб чиқди. Бу гол жамоага ишонч бериб, иккинчи таймда янада фаол ўйнашга туртки бўлди.
Танаффусдан кейин “Интер” яна бир бор рақиб ҳимоясини очиб ташлади. 48-дақиқада Диуф гол уриб, фарқни икки тўпга етказди — 2:0. Бироқ “Торино” таслим бўлмади: 57-дақиқада Куленрович ҳисобни қисқартириб, интригани қайтарди.
Шундан кейин ўйин анча қизиди. “Торино” босимни оширди, “Интер” эса ҳисобни сақлаб қолиш учун тартибли ҳимоя ва тўғри алмашинувларга таянди. Киву иккинчи бўлимда бир қатор ўзгаришлар қилди: Мхитарян ўрнига Сучич, Тюрам ўрнига Лаутаро Мартинес, Бонни ўрнига Эспозито туширилди. Бу алмашинувлар ўйин темпини назорат қилишда ва хавфли ҳужумларни “ўчириш”да ўз самарасини берди.
Якунда “Интер” ўз майдонидаги устунликни йўқотмади ва 2:1 ҳисобидаги ғалабани ушлаб қолди. Шу тариқа, “нерадзуррилар” Италия Кубоги яримфиналига чиқди ва трофей учун курашда яна бир қадам олдинга ташлади.
Италия Кубоги, 1/4 финал
Интер – Торино 2:1
Голлар: Бонни 35, Диуф 48 – Куленрович 57
Интер: Мартинес, де Врей, Ачерби, Карлос, Камате (Луис Энрике, 80), Фратеззи, Мхитарян (Сучич, 56), Диуф, Коччи (Биссек, 75), Тюрам (Лаутаро Мартинес, 56), Бонни (Эспозито, 56)
Торино: Палеари, Мариануччи (Марипан, 61), Коко, Тамезе, Педерсен (Лазаро, 61), Власич, Прати, Анжорин, Обрадор, Нжие (Запата, 73), Куленович.