USA: Uendra styringsrente
Den amerikanske sentralbanken (Fed) held styringsrenta uendra, etter sitt første rentemøte i år.
Renta blir liggande i intervallet 3,50 til 3,75 prosent, etter ei avstemming der 10 stemte for og 2 imot.
Sentralbanken viser til solid økonomisk vekst og teikn til stabilisering i arbeidsmarknaden.
Dei held fast ved linja trass i aukande press frå president Donald Trump om rentekutt.
Trump har fleire gonger kravd at Fed set ned renta.
Førre veke uttalte sentralbanksjef Jerome Powell seg etter at det amerikanske justisdepartementet har starta ei etterforsking der han blir skulda for å ha gitt feil informasjon til Kongressen.
I ei uttale går Powell hardt ut mot Trump og seier at saka handlar om at han har nekta å etterkome krav frå administrasjonen.