«Фенербахче» собиқ футболчиси Моуриньони ваъдасида турмади дея танқид қилди

«Фенербахче»нинг собиқ футболчиси Линкольн жамоани 2024–2025 йилларда бошқарган португалиялик мураббий Жозе Моуриньо ҳақида кескин фикр билдирди. Бу ҳақда euro-football.ru хабар беради.

Линкольннинг айтишича, Моуриньо унга берган ваъдасини бажармаган ва футболчига нисбатан ҳурматсизлик қилган. «У кўп соврин ютган, буни ҳеч ким инкор этмайди. Лекин мен учун ҳаётда характер унвонлардан муҳимроқ. Моуриньо мени ҳайратда қолдирди», — деди у.

Футболчи «Ҳалл Сити»га ижара асосида кетишидан аввал мураббий билан гаплашганини, Моуриньо эса уни ёзги йиғинга Португалияга кутаётганини айтганини таъкидлади. Линкольн мавсумни «Ҳалл Сити»да якунлагач, йиғинга чақирувни кутган, бироқ кейинчалик Моуриньо у билан мулоқот қилишдан бош тортган.

«Таржимон орқали боғланмоқчи бўлдим, у эса спорт директорига мурожаат қилишимни айтди. Жамоа Португалияда йиғинда эди, мен ҳам Португалияда уйда эдим, лекин барибир мени Истанбулга қайтариб, алоҳида машғулот ўтказишни буюрди», — дея воқеаларни эсллади Линкольн.

Унинг сўзларига кўра, клуб учун кўплаб ўйинларда, ҳатто ўз позициясида бўлмаган пайтда ҳам максимал даражада ҳаракат қилган. Шунингдек, оғир жароҳатдан кейин қўллаб-қувватлаш кутганини, аммо бундай муносабатни сезмаганини айтди. «Мен бошқалар каби машҳур эмасман, лекин доим майдонда боримни берганман», — деди у Fanatik нашрига берган интервьюсида.

Ҳозирда Жозе Моуриньо «Бенфика»ни бошқармоқда.