ПСЖ Луис Энрике билан шартномани узайтириш бўйича гаплашмоқда
ПСЖ бош мураббий Луис Энрике билан амалдаги келишувни узайтириш масаласини кун тартибига чиқарди. Бу ҳақда euro-football.ru хабар беради.
Le Parisien журналисти Бенжамен Куарез хабарига кўра, Париж клуби испаниялик мутахассис билан янги шартнома бўйича музокараларни бошлаб юборган. Клуб раҳбарияти жамоани Энрике билан бирга қуришни истамоқда, чунки у ПСЖ лойиҳасининг асосий устунларидан бири сифатида кўрилмоқда. Манбага кўра, мураббий ҳам Парижда ўзини яхши ҳис қилмоқда ва клуб ичида Энрикенинг яқин вақт ичида кетиши деярли тасаввур қилиб бўлмас ҳолат деб баҳоланади.
Луис Энрике ПСЖни 2023 йилдан буён бошқариб келмоқда. Унинг ҳозирги шартномаси 2027 йил 30 июнгача амал қилади. Энрике қўл остида парижликлар уч бор Франция Суперкубогини, икки мартадан Лига 1 ҳамда Франция Кубогини қўлга киритди, шунингдек бир мартадан Чемпионлар лигаси, УЕФА Суперкубоги ва Қитъалараро кубокда ҳам зафар қучди.