«Фенербахче» собиқ футболчиси Моуриньони ваъдасида турмади деб танқид қилди
«Фенербахче»нинг собиқ футболчиси Линкольн жамоани 2024–2025 йилларда бошқарган португалиялик мураббий Жозе Моуриньодан норозилигини билдирди. Бу ҳақда euro-football.ru хабар беради.
Линкольн Fanatik нашрига берган интервьюсида Моуриньони берган ваъдасини бажармаганликда айблади. Футболчи мураббий билан «Халл Сити»га ижара асосида кетишидан олдин гаплашганини, Моуринью эса уни ёзги йиғинга Португалияга кутишини айтганини таъкидлади.
Унинг сўзларига кўра, «Халл Сити»даги мавсум якунлангач, у йиғинга чақирувни кутган. Бироқ Моуринью билан боғланмоқчи бўлганида, мураббий мулоқотдан бош тортиб, спорт директорига мурожаат қилишни айтган.
Линкольн жамоа Португалияда йиғинда бўлган пайтда ўзи ҳам Португалияда эканини, шунга қарамай Моуринью уни Истанбулга юбориб, алоҳида тартибда машғулот ўташни буюрганини айтди. Футболчи буни ўзига нисбатан адолатсиз ва ҳурматсиз муносабат сифатида баҳолади.
Шунингдек, Линкольн кўплаб ўйинларда ҳатто ўз позициясида бўлмаса ҳам клубга ёрдам бериш учун бор кучини берганини, оғир жароҳатдан кейин эса қўллаб-қувватлаш кутгани, лекин буни ҳис қилмаганини қўшимча қилди.
Ҳозирда Жозе Моуринью «Бенфика»ни бошқармоқда.