«Фенербахче» собиқ футболчиси Моуриньони ваъдасида турмади деди
«Фенербахче»нинг собиқ футболчиси Линколн жамоани 2024–2025 йилларда бошқарган Жозе Моуриньони кескин танқид қилди. У португалиялик мураббий ўзига берган ваъдасини бажармаганини таъкидлади. Бу ҳақда euro-football.ru хабар беради.
Линколннинг айтишича, у «Халл Сити»га ижарага кетишидан олдин Моуринью билан гаплашган ва мураббий уни Португалиядаги ёзги йиғинга кўришни исташини билдирган. Футболчи мавсумни «Халл Сити»да якунлаб, йиғинга чақирув кутган, бироқ кейинроқ мураббий у билан мулоқот қилишдан бош тортган.
«Мен таржимон орқали Моуринью билан боғланмоқчи бўлдим, лекин у гаплашишни истамади ва спорт директорига мурожаат қилишимни айтди. Жамоа Португалияда эди, мен ҳам Португалияда уйимда эдим, шунга қарамай у мени Истанбулга жўнатиб, алоҳида машғулот ўтказишни буюрди. Бу менга нисбатан адолатсиз ва ҳурматсиз муносабат эди», — деди Линколн Fanatik нашрига берган интервьюсида.
У, шунингдек, кўплаб учрашувларда ўз позициясида ўйнамаса ҳам клубга ёрдам бериш учун борини берганини, оғир жароҳатдан кейин эса қўллаб-қувватлаш кутгани ҳолда уни ҳис қилмаганини қўшимча қилди. «У кўп ютуқларни қўлга киритган — буни ҳеч ким инкор этмайди. Аммо ҳаётда характер титуллардан муҳимроқ», — дея фикрини якунлади футболчи.
Ҳозирда Жозе Моуринью «Бенфика»ни бошқармоқда.