Ўзбекистон Марказий Осиёда ҳарбий қудрат рейтингида етакчиликни қўлга киритди

Global Firepower тузган янгиланган ҳарбий қудрат индексида Ўзбекистон Қуролли кучлари ўз мавқеини сезиларли даражада мустаҳкамлади. 145 та давлат қамраб олинган рўйхатда мамлакат 53-ўринга чиқиб, Марказий Осиё бўйича энг юқори натижани қайд этди. Бу ҳақда podrobno.uz хабар беради.

Global Firepower’нинг 2026 йилги рейтингига кўра, Ўзбекистон ўтган йилга нисбатан беш поғона юқорилаган ва 58-ўриндаги Қозоғистондан ўзиб кетган.

Рейтингда Ўзбекистоннинг муҳим устунликларидан бири сафарбарлик салоҳияти сифатида кўрсатилган. 36,5 млн аҳоли орасида қарийб 16 млн киши ҳарбий хизматга яроқли деб баҳоланади. Қуролли кучларда тахминан 120 минг ҳарбий хизматчи хизмат қилади, уларнинг асосий қисми қуруқлик қўшинларига тўғри келади.

Армия техник таъминоти ҳам юқори кўрсаткичларга эга: 470 та танк ва 8 692 та зирҳли техника мавжуд. Артиллерия йўналишида, жумладан, 177 та ўзийўрар артиллерия қурилмаси қайд этилган бўлиб, бу кўрсаткич бўйича Ўзбекистон дунёда 23-ўринда туради.

Ҳарбий ҳаво кучлари тасарруфида 159 та учиш техникаси бор, шундан 101 таси вертолётлар. Зарба берувчи авиацияга алоҳида эътибор қаратилгани таъкидланади: 34 та зарба вертолёти Ўзбекистонга ушбу параметр бўйича глобал рейтингда 20-ўринни таъминлаган.

Умуман олганда, қўшинлар тузилмаси ва кўрсаткичлар Ўзбекистоннинг Марказий Осиёда ҳарбий етакчи сифатидаги позициясини кучайтирди. Минтақадаги ўринлар: Ўзбекистон — 53, Қозоғистон — 58, Туркманистон — 78, Тожикистон — 100, Қирғизистон — 109.