Марк Гехи “Манчестер Сити”га ўтди: расман таклиф ва битим...
“Манчестер Сити” қишки трансфер бозорида яна бир муҳим қадам ташлади — “Кристал Пэлас”нинг марказий ҳимоячиси Марк Гехини ўз сафига қўшиб олди.
Трансфер атрофидаги жараён жуда тезлашгани айтилади. Хусусан, Фабрицио Романонинг ёзишича, “шаҳарликлар” сўнгги 12 соат ичида катта таклиф билан чиқди ва футболчининг шартлари бўйича ҳам жиддий вариантни тақдим этди. Шу билан бирга, зарурат бўлса, “Кристал Пэлас” билан музокараларни янада фаоллаштиришга тайёр экани ҳам таъкидланган.
Романонинг маълумотига кўра, Англия терма жамоаси ҳимоячиси бўлган 25 ёшли Гехи 20 миллион еврога харид қилинган. Қизиғи, бу трансфер учун курашда “Манчестер Сити” рақобатчилар — “Бавария” ва “Ливерпуль”ни ортда қолдиргани ҳам қайд этилди. Аммо шартнома муддати ҳали очиқланмаган.
Эътиборли жиҳат: “Transfermarkt” портали Марк Гехининг бозор баҳосини 55 миллион евро атрофида деб кўрсатади. Демак, “Сити” бу трансферни нарх-сифат нуқтаи назаридан анча фойдали битим сифатида ёпгани ҳақида гапириш мумкин.
Энди асосий савол битта: Гехи Гвардиола тизимида қанчалик тез “ўзини топади”? Агар у мослашишни тез бажарса, “Сити” ҳимоясида рақобат янада қизийди — ва бу жамоа учун фақат плюс.