Гришин Алонсога Германияда қолиш фойдалироқ эди деб ҳисоблайди
ЦСКА собиқ ярим ҳимоячиси Александр Гришин Хаби Алонсонинг Мадриднинг «Реал» клубига йўл олгани хато қарор бўлганини айтди. Бу ҳақда euro-football.ru хабар беради.
Мутахассис фикрича, Алонсо Германияда қолса маъқулроқ эди: «Байер» билан Бундеслигадаги чемпионликдан кейин у ерда мураббийнинг обрўси кескин ошган, унга нисбатан ишонч ва эътироф юқори бўлган.
«Менимча, у Германияда қолиши керак эди, у ерда ҳамма уни қадрларди. Лекин «Реал»га йўқ дейиш қийин. Яхши ният қилди, аммо натижа аксинча бўлиб чиқди», — деди Гришин «Матч ТВ» эфирида.
Эслатиб ўтамиз, Алонсо ва «Реал» Испания Суперкубогида «Барселона»га 2:3 ҳисобида ютқазгач, шартномани бекор қилган.
Энди жамоа билан ишлаш собиқ Испания терма жамоаси ҳимоячиси Альваро Арбелоага топширилади.