Балиқ Қозоғистонда қолди: Линдеманннинг Тошкентдаги концерти шов-шувсиз ўтди
Rammstein гуруҳининг солисти Тилл Линдеманн Тошкентда саҳнага чиқди, бироқ бу гал концерт унинг одатий эпатаж унсурларисиз ўтди. «RIA Novosti» ёзишича, аввалроқ Қозоғистондаги чиқишларида у томошабинлар томон балиқ ва пироглар улоқтирган.
Тошкентдаги концерт 9 январ куни Axelon Karting Centre картинг маркази ҳудудида ташкил этилди. Ташкилотчиларга кўра, томошабинларнинг қарийб ярми хориждан келган бўлиб, уларнинг асосий қисми Россиядан ташриф буюрган.
Чипталар нархи 1,2 млн сўмдан бошланган, VIP ҳудудга кириш эса 4 млн сўм этиб белгиланган. Концертга фақат вояга етганлар киритилди.
8 минг кишига мўлжалланган майдон 80% га яқин тўлди. Чиқиш давомида Линдеманн томошабинларни «Davaй, davaй!» дея руҳлантириб турган, якунда эса «Danke, спасибо!» сўзлари билан миннатдорлик билдирган.
Тилл Линдеманн — немис мусиқачиси, шоир ва вокалист бўлиб, кенг жамоатчиликка Rammstein гуруҳининг фронтмени сифатида танилган. У кучли ижро услуби ҳамда провокацион саҳна образлари билан машҳур, шунингдек, Lindemann номли яккахон лойиҳаси устида ишлайди ва шеърий тўпламлар ҳам нашр этади.