Самарқандда пайғамбаримиз Муҳаммад (с.а.в.)ни ҳақорат қилган йигит қамалди
2025 йилнинг 30 декабрида Самарқандда диний адоватни тарғиб қилган шахс аниқланди. Бу шахс 2004 йилда туғилган бўлиб, интернет ижтимоий тармоқларидан бири бўлган «Телеграм» мессенжери орқали ўзининг шахсий профилида, бир неча каналлардан бирининг изоҳ қисмида, пайғамбаримиз Муҳаммад (с.а.в.)га ҳақоратли билдирувлар тарқатган.
Ҳодиса юзасидан тезкор текширувлар олиб борилган ва шахснинг бу ҳаракатлари Ўзбекистон Республикаси Маъмурий жавобгарлик тўғрисидаги кодексининг 184³-моддасига мувофиқ текширилди. Текширув натижасида, мазкур шахсга нисбатан маъмурий баённома расмийлаштирилди ва суд органларига қонуний қарор қабул қилиш учун юборилди.
2026 йил 9 январда Пахтачи тумани суди қарорига кўра, мазкур шахснинг ҳаракатлари қонунга зид деб топилди ва унга 12 сутка маъмурий қамоқ жазоси тайинланди. Суд қарорида ушбу шахснинг диний адоватни тарғиб қилувчи материалларни тарқатгани аниқланган.
Эслатиб ўтамиз, Ўзбекистон Республикасининг қонунчилигига кўра, миллий, ирқий, этник ёки диний адоватни тарғиб қилиш ёки уни тарқатиш жавобгарликка сабаб бўлади. Бу каби ҳодисалар, давлатда тинчлик ва тотувликни сақлаш учун муҳим аҳамиятга эга бўлиб, ҳар бир шахснинг жамиятдаги масъулиятини янада аниқлаштирмоқда.