Тунда Тошкент аэропортида электр ўчиб қолди
6 январь куни тунги соатларда Тошкент халқаро аэропортида қисқа муддатли электр узилиши кузатилди. Бу ҳақда Uzbekistan Airports расмий ахборот берди.
Маълум қилинишича, маҳаллий вақт билан соат 02:28 да Қўйлиқ подстанциясида юзага келган кичик техник носозлик сабабли аэропорт ҳудудида электр таъминоти қисман узилган. Шу билан бирга, мазкур ҳолат самолётларнинг қўниши ва учиши жараёнларига таъсир кўрсатмаган.
Хабарга кўра, аэропортнинг келиш ва кетиш заллари захира дизель генераторлар ҳамда UPS тизимлари орқали узлуксиз электр энергияси билан таъминланган. Барча хизматлар одатий тартибда ишлашда давом этган.
Мутахассисларнинг тезкор ҳаракатлари натижасида соат 02:49 га келиб электр таъминоти тўлиқ тикланган. Компания томонидан йўловчиларга етказилган ҳар қандай вақтинчалик ноқулайликлар учун узр сўралган ва тушуниш учун миннатдорлик билдирилган.
Расмийлар вазият тўлиқ назорат остида бўлганини таъкидламоқда.