Игорь Семшов «Ювентус»нинг скудетто учун имконини баҳолади

Москванинг «Динамо» клубида тўп сурган собиқ ярим ҳимоячи Игорь Семшов Туриннинг «Ювентус» жамоасининг 2025/2026 йилги мавсумда А Серияда чемпионлик, яъни скудетто учун имкониятлари ҳақида фикр билдирди. Унинг таъкидлашича, «Ювентус» чемпионлик пойгасидан чиқиб кетмаган, чунки юқори ўринлар учун курашаётган жамоаларнинг ўйинида барқарорлик етишмаяпти.

«Етакчи учлик тез-тез очко йўқотади, «Ювентус» эса скудетто учун қандай курашишни билади. Туринликлар ҳали яна жиддий рақобат уйғотади», — дея Семшовнинг сўзларини «Матч ТВ» келтирди.

Кеча «Ювентус» А Сериянинг 16-турида ўз майдонида «Рома»ни 2:1 ҳисобида мағлуб этди. Турин клуби 29 очко жамғарган ҳолда турнир жадвалида бешинчи ўринда бормоқда.

Жамоа пешқадам «Интер»дан тўрт очко ортда қолмоқда.