Ўзбекистонда келгуси йили 4,5 миллион тонна пахта етиштириш мақсад қилинди
Шавкат Мирзиёев 3 декабр куни кимё саноатида ишлаб чиқаришни ошириш, экспортни ривожлантириш ва таннархни пасайтириш учун амалга ошириладиган тадбирлар ҳақида маълумот берди. Президентнинг таъкидлашича, 2030 йилгача кимё саноати тармоғини икки баробарга, минерал ўғитлар ишлаб чиқаришни 1,5 баробарга ошириш ва экспорт ҳажмини 1 миллиард долларга етказиш режалаштирилган.
Жорий ҳолатда тармоқда 21 та йирик лойиҳа амалга оширилмоқда, уларнинг умумий қиймати 1 миллиард долларни ташкил қилади. Бундан ташқари, келгуси уч йилда яна 4,5 миллиард долларлик янги ташаббуслар жорий қилиниши режалаштирилган.
Қимматли ресурсларни тежаш ва рақобатбардошликни ошириш учун энергияни тежайдиган технологияларни жорий қилиш, ҳамда рақамлаштириш зарурияти кўрсатилди. Азотли ўғитлар таннархининг 55 фоизини ташкил этадиган энергия харажатларини оптимизация қилиш мақсадида амалга ошириладиган чоралар муҳим.
Кимё саноатини янада ривожлантириш учун маҳаллий хом ашёни чуқур қайта ишлаш, янги маҳсулот турларини ишлаб чиқариш ва экспортни камида икки баробарга ошириш мумкинлиги таъкидланди. Мавжуд лойиҳалар орқали Тошкент, Навоий ва Жиззах вилоятларида янги "яшил" минерал ўғитлар, калий ксантогенат, калий сулфати каби юқори қўшилган қийматли маҳсулотлар ишлаб чиқариш бошланди.
2025 йилда 4,5 миллион тонна пахта етиштириш мақсад қилинган. Бунга эришиш учун фосфорли ўғитлар захирасини тайёрлаш, фермерларга етарли миқдорда сулфат кислотасини етказиб бериш ва имтиёзли кредитлар ажратиш ишлари тезлаштирилади.
Шунингдек, президент кимё саноатини мамлакат иқтисодиётидаги стратегик тармоқ деб эътироф этди ва ички бозорни барқарор таъминлаш, экспорт салоҳиятини ошириш ҳамда янги иш ўринларини яратиш учун аниқ топшириқлар берди.