Сирдарёда тўрт машина тўқнашди, бир ҳайдовчи жароҳатланди
Сирдарё вилоятида бир вақтда тўртта автомашина иштирокида йўл-транспорт ҳодисаси содир бўлиб, бир ҳайдовчи жароҳат олди. Бу ҳақда вилоят ЙҲХБ маълумот берди.
Маълумотларга кўра, 30 ноябрь куни соат 13:45 да Мирзаобод туманидаги “Оқолтин” МФЙ ҳудудидан ўтувчи М-34 йўлининг “Душанбе–Тошкент” йўналиши 94-километрида Isuzu ҳайдовчиси навбат билан бурилмоқчи бўлган VAZ-2101 ва иккита Nexia-3 автомашиналарининг орқа томонидан келиб урилган.
Тўқнашув натижасида VAZ-2101 ҳайдовчиси тиббий ёрдамга мурожаат қилган. Қолган машиналарга моддий зарар етган.
Мирзаобод тумани ИИБ томонидан ҳодиса юзасидан суриштирув ҳаракатлари олиб борилмоқда. ЙҲХБ барча ҳайдовчиларни ҳушёрликка ва қоидаларга қатъий амал қилишга чақирди.