1 декабрдан Ўзбекистонда нималар ўзгаради?
2025 йил 1 декабрдан мамлакат қонунчилигида бир қатор муҳим янгиликлар амалга киритилади. Ушбу ўзгаришлар нафақат иқтисодий соҳаларни, балки истеъмолчилар ҳуқуқи, экология, хавфсизлик, никоҳ тузиш тартиби, тадбиркорлик ва жамоат фаолияти каби кўплаб йўналишларни қамраб олади. Қуйида эътиборга молик барча янгиланишлар кенгроқ баён қилинди.
Аи-80 бензини сотуви тўлиқ тўхтатилади
Экологик тоза ва сифатли ёнилғига ўтишни жадаллаштириш мақсадида 1 декабрдан автомобилларга ёнилғи қуйиш шохобчаларида Аи-80 бензини савдоси чекланади. Бу жараён мамлакатда ҳаво сифати ва экологик барқарорликни оширишга қаратилган катта чоралардан бири сифатида кўрилади.
Истеъмолчилар мурожаатларини кўриб чиқишда янги тизим ишлайди
Эндиликда “истеъмолчи — тадбиркор — ННО — давлат органлари” занжири асосида мутлақо янгича механизм йўлга қўйилади. Бу тизим муаммоларни тезроқ кўриб чиқиш, тарафлар билан самарали мулоқот қилиш ва истеъмолчилар ҳуқуқини янада кучлироқ ҳимоя қилишни таъминлайди.
Экология маълумотлари тўлиқ очиқланади
Ўзбекистон Орхус конвенциясини ратификация қилгани муносабати билан Экология вазирлиги давлат экологик мониторинг маълумотларини очиқ базада жойлаштириб боради. Унда:
-“Яшил макон” доирасида экилган дарахтлар;
-дарахт кесиш учун бериладиган рухсат аризалари;
-жамоатчилик эшитувлари натижалари;
-сув ҳавзаларда ноқонуний қазиш билан боғлиқ маълумотлар
каби муҳим ахборотлар мавжуд бўлади.
Бу эса экологик жараёнларнинг шаффофлигини оширади ва жамоатчилик назоратини янада мустаҳкамлайди.
Сейсмологик онлайн платформа фойдаланишга топширилади
Янги платформа орқали аҳоли:
-эҳтимолий зилзилалар акселерограммаси базалари,
-умумий ва батафсил сейсмик районлаш хариталари,
-фаол тектоник ёриқлар тўғрисидаги маълумотлар билан эркин танишиши мумкин бўлади. Ушбу платформа мамлакатнинг сейсмик ҳудудларда хавфсизлик чораларини кучайтиришга ёрдам беради.
Никоҳни расмийлаштиришда тиббий маълумотнома талаб қилинмайди
Ахборот алмашинуви рақамлаштирилгани боис: никоҳланувчилардан тиббий кўрик натижасини олиб келиш талаби,
-никоҳдан ажрашишда суд қарорини қоғозда тақдим этиш талаблари бекор қилинади. Бу жараёнларни анча енгиллаштиради ва ортиқча қоғозбозликни камайтиради.
Тадбиркорлар учун янги кафолат ва имкониятлар
Тадбиркорликни ривожлантириш компанияси томонидан: йирик бизнесга 10 млрд сўмгача кафиллик;
-“яшил” иқтисодиёт, ишлаб чиқариш ва хизмат кўрсатиш лойиҳаларига катта қўллаб-қувватлаш;
-яхши кредит тарихига эга тадбиркорларга кафолат лимитини 1,5 баравар ошириш каби янги имкониятлар тақдим этилади. Шу билан тадбиркорлик муҳитини янада жонлантириш мақсад қилинган.
Халқаро туризм академиясининг Самарқанд кампуси иш бошлайди
Туризм соҳаси мутахассислари махсус ўқув дастурлари орқали қайта тайёрланади ва малака оширади. Битирувчиларга халқаро даражада эътироф этиладиган сертификатлар берилади.
Нодавлат суд экспертлари мустақил фаолият юритишига рухсат
Эндиликда нодавлат суд экспертлари алоҳида суд-экспертлик бюроси шаклида мустақил ишлай олади. Бу соҳада рақобатни ошириб, хизмат сифатини янада яхшилайди.
Норматив-ҳуқуқий ҳужжатлар таҳлили учун ягона платформа ишга тушади
Адвокатлар, юристлар, судьялар ва кенг жамоатчилик қонун ҳужжатларини қиёсий таҳлил қилиш имконига эга бўлади. Платформада сунъий интеллект технологиялари ҳам жорий этилади.
Бутун мамлакат маҳаллалари ягона реестрга киритилади
1 декабргача тўлиқ ишга тушадиган ягона реестрда ҳар бир маҳалла ҳақида ишончли ва янгиланган маълумотлар сақланади. Бу маҳалла фаолиятини самарали бошқаришга ёрдам беради.