Ўзбекистон ҳавоси учун: Машиналар «тоза», «ўрта» ва «зарарли»га бўлинади!
Янги Экологик Низом Тасдиқланди
Жорий йил 28 ноябрдаги 750-сонли Вазирлар Маҳкамасининг қарори билан автомобиллардан чиқадиган ифлослантирувчи моддаларнинг атмосферага етказиладиган зарар нормативларига мослигини аниқлаш тартиби ва тегишли низом тасдиқланди. Эндиликда, Ўзбекистондаги барча транспорт воситалари экологик тоифаларга ажратилади ва уларга махсус экологик стикерлар берилади.
Қандай Мезонлар Асосида Ажратилади?
Низомга кўра, ҳар бир автомобилнинг экологик тоифаси унинг ишлаб чиқарувчи томонидан тасдиқланган синфига қараб белгиланади ва уч асосий тоифага бўлинади:
-
«Тоза» тоифа (Яшил стикер): Бензин ёки газли машиналар учун «Евро-2» ва ундан юқори синфдагилар, дизеллилар учун «Евро-4» ва юқори. Шунингдек, Гибрид ва электромобиллар, ҳамда ишлаб чиқарилганига 3 йилдан ошмаган транспорт воситалари ҳам шу тоифага киради.
-
«Ўрта» тоифа (Сариқ стикер): Бензин/газлилар учун «Евро-0» ва «Евро-1», дизеллилар учун «Евро-3» синфдагилар.
-
«Зарарли» тоифа (Қизил стикер): Фақат дизел ёқилғисида ҳаракатланувчи, энг паст – «Евро-0» дан «Евро-2» гача бўлган синфдаги транспортлар.
Стикер Олиш Тартиби
Транспорт воситаларини рўйхатга олиш жараёнида уларнинг тоифаларига мос равишда «яшил», «сариқ» ёки «қизил» рангли экологик стикерлар Йўл ҳаракати хавфсизлиги бўлинмаларида махсус операторлар томонидан берилади. Эътиборли жиҳати, транспорт эгаси стикер олиш учун my.gov.uz портали орқали ўз хоҳишига кўра мурожаат қилиши мумкин. Ушбу экологик стикерлар муддатсиз даврга амал қилади.