Газ алангаси хавфми ёки атайлаб қилинганми? Мутахассислар нима дейди?
Ижтимоий тармоқларда Сурхондарё вилояти, Бойсун туманидаги газ алангаси акс этган видео муҳокамаларга сабаб бўлди. Аҳоли орасида бу ҳолат "газ сизиб чиқиши" ёки фавқулодда портлаш деб талқин қилинди.
Аммо Энергетика вазирлиги ҳолат юзасидан расмий баёнот берди. Қайд этилишича, бу — "М-25" конининг 202-сон қудуғида бир ҳафта аввал кузатилган геологик жараён натижаси бўлиб, аввал ёқиб қўйилган оловнинг вақтинчалик сўниб, яна қайта ёқилиши билан боғлиқ ҳолатдир.
Мутахассислар бу жараённи назорат остидаги табиий геологик ҳодиса сифатида баҳолашмоқда. Энергетика вазирлиги таъкидлашича, ҳаво ва атроф-муҳитга зарарли моддалар чиқмаслиги учун бундай олов ёқиш халқаро амалиётда қўлланиладиган усул ҳисобланади.
“Айни дамда “М-25” конидаги вазият барқарор. Барча ишлар махсус мутахассислар томонидан назорат қилинмоқда. Бу усул саноат хавфсизлиги талабларига тўла жавоб беради,” — дейилади расмий баёнотда.