Тезюрар поездлар энди ўзимизда ишлаб чиқариладими?
Ўзбекистонда темирйўл транспорти соҳасида янги босқич бошланиш арафасида. Расмий маълумотларга кўра, мамлакат 2027-йилдан бошлаб маҳаллий корхоналарда тезюрар поездларни ишлаб чиқаришни йўлга қўйишни режалаштирмоқда.
Бу борадаги режалар ҳақида “Ўзбекистон темир йўллари” акциядорлик жамияти раисининг биринчи ўринбосари Ҳикматулла Раҳматов оммавий ахборот воситаларига маълумот берди. Унинг айтишича, лойиҳа дунё миқёсида илғор технологияларга эга давлатлардан бири билан ҳамкорликда амалга оширилади.
Ушбу ташаббус нафақат мамлакатнинг темирйўл инфратузилмасини ривожлантириш, балки технологик мустақиллик сари дадил қадам бўлади. Лойиҳанинг расмий ҳужжатлари, яъни қарор ва йўл харитаси яқин ҳафталарда тасдиқланиши кутилмоқда.
Дастлабки босқичда йилига 10 дона замонавий тезюрар поезд ишлаб чиқарилиши мўлжалланмоқда. Бу поездлар Ўзбекистон ичидаги йирик шаҳарларда йўловчи ташиш сифатини сезиларли даражада ошириши кўзда тутилган.