Россияда WhatsAppга тўлиқ блок хавфи кучайиб бормоқда
Россияда WhatsApp мессенжери атрофида жиддий вазият юзага келмоқда — платформа маҳаллий қонун талабларига тўлиқ риоя қилмаса, мамлакат ҳудудида умуман ишламай қолиши мумкин. Бу ҳақда Россия алоқа, ахборот технологиялари ва оммавий коммуникациялар соҳаси устидан назоратни амалга оширувчи федерал хизмат — Роскомнадзор расман маълум қилди.
WhatsApp’га нисбатан қўлланилаётган чеклов чоралари босқичма-босқич кучайтирилмоқда. Сабаб сифатида мессенжер Россия ҳудудида жиноятларни олдини олишга қаратилган қонун нормаларини бажармаётгани кўрсатилган.
Роскомнадзор версиясига кўра, платформа террорчилик ҳаракатларини уюштириш, ижрочи ва иштирокчиларни ёллаш, шунингдек, фуқароларга қарши фирибгарлик ва бошқа турдаги жиноятларда фойдаланилаётгани айтилган. Шу боис хизмат мессенжерни назоратга олиб, чекловларни кенгайтиришга мажбур бўлган.
Маълумотда таъкидланишича, чекловлар босқичли тарзда жорий этиляпти — бу эса фойдаланувчиларга бошқа мессенжерларга ўтиб олиш имконини беради. Агар WhatsApp Россия қонунчилиги талабларини бажаришдан бош тортса, тўлиқ блокланиши муқаррар.
WhatsApp’даги қўнғироқлар сифати август ойидан бери сезиларли равишда ёмонлашганди. Октябрда Роскомнадзор расман мессенжер фаолиятини қисман чеклаганини айтган ва буни жиноятчиларга қарши кураш зарурати билан изоҳлаган. 28 ноябрь куни ҳам мамлакат бўйлаб, айниқса Москва шаҳрида, сервисда жиддий узилишлар, хабар юборишда кечикишлар, фото ва видео жўнатишда қийинчиликлар кузатилган.
WhatsApp Россияда энг оммабоп мессенжерлардан бири ҳисобланади. Google Play маълумотларига кўра, у “Алоқа” тоифасидаги иловалар орасида бешинчи ўринда турибди. Mediascope’нинг 2025 йил октябрь таҳлилларига қараганда, Россияда WhatsApp аудиторияси 96,2 миллион фойдаланувчини ташкил этса, Telegram 91 миллион кишига етган.
WhatsApp’нинг Россияда тўлиқ блокланиши ҳақидаги муҳокамалар 2024 йилдан буён давом этмоқда. Давлат Думаси қўмитаси раҳбари Сергей Боярский ўтган йил декабрда бу ҳақдаги овозаларни “миш-миш” деб атаган ва масала бўйича эҳтиёткор фикр билдиришга чақирган эди.