Ғазода болалар олов ёқиш учун чиқинди йиғмоқда
Ғазонинг Ал-Мағози лагерида уруш оқибатида юзага келган инқироз инсоният фожиасига айланмоқда. Лагерда яшовчи кўплаб болалар ҳар куни вайроналар ва чиқинди тўплари орасида картон, пластик ва ёғоч қидиришга мажбур. Улар йиғаётган материаллар оилаларнинг кундалик эҳтиёжи — озиқ-овқат тайёрлаш учун олов ёқишга ишлатилмоқда.
Минтақага газ етказиб бериш тўхтагани боис, минглаб оилалар овқат пиширишда муаммога дуч келган. Натижада, ҳарорат пасайиб бораётган вақтда болаларнинг оғир меҳнатга жалб қилинаётгани кундалик ҳолатга айланган.
Маҳаллий аҳоли бу ҳолатни инсоний фожеа деб атамоқда. Болалар нафақат мактабдан, балки болаликдан ҳам айрилган. Улар учун энг оддий ҳаётий қулайликлар орзуга айланган.