Вейплар савдосига тақиқ эълон қилинди
Ўзбекистон Президенти Шавкат Мирзиёев электрон сигаретлар ва уларга мўлжалланган суюқликларни сотишни тақиқловчи қонунни имзолади. Бу ҳақда Адлия вазирлиги матбуот хизмати маълум қилди.
Электрон сигаретларни йирик миқёсда ишлаб чиқариш, экспорт ёки импорт қилиш учун жарима ёки озодликдан маҳрум қилиш жазоси қўлланилади. Жарима миқдори 500 базавий ҳисоблаш миқдорига (206 миллион сўм) етиши мумкин.
Шунингдек, қоидабузар уч йилгача тузатиш ишлари ёки беш йилгача озодликдан маҳрум қилиш жазоси билан жазоланади. Такрорий қоидабузарлик учун ҳам шунга ўхшаш чоралар кўрилади.
Бироқ, агар айбдор ўз хоҳиши билан ҳуқуқни муҳофаза қилиш органларига мурожаат қилиб, айбини тан олса ва тақиқланган маҳсулотларни топширса, жазодан озод этилади.