Kvinne med barnevogn rygga på av varebil – sjåfør nektar straffskuld
Politi og ambulanse rykka ut til Holevegen på Stord etter melding om at ei kvinne med barnevogn vart rygga på av ein varebil.
Ifølgje politiet ser barnet ut til å vere uskadd, men kvinna har smerter i kroppen etter samanstøyten. Ho er tatt med til Stord sjukehus for sjekk av helsepersonell.
Barnet blir ivaretatt av familien. I tillegg hadde kvinna ein hund med seg som også skal ha fått seg ein «trøkk».
Føraren skal ha snakka med kvinna på staden etter påkøyringa. Vedkommande blei bedt om å vente, men valte likevel å køyre vidare.
Politiet blei etter kvart ringt opp av sjåføren av varebilen og fekk avhøyrd han på politistasjonen fredag føremiddag.
Politiet har tatt beslag i førarkortet. Mannen erkjenner ikkje straffskuld og samtykka ikkje i beslaget.
– Beslaget må så snart som mogleg oppretthaldast i retten, opplyser operasjonsleiar Victor Fenne-Jensen i Sørvest politidistrikt til NRK.
– Kva bevis har de for å eventuelt oppretthalde beslaget?
– Det er forklaringa både til han sjølv og forklaringa til kvinna og andre undersøkingar og spor i saka, seier Fenne-Jensen.