Трамп сиёсатига ички танқид: Республикачилар TEPUBLICAN бўладими?
АҚШ сиёсатида янги сиёсий ном пайдо бўлиш арафасида. Президент Доналд Трампнинг ўзи Truth Social платформасида Республикачилар партиясининг унинг сиёсатини қўллаб-қувватловчи аксарият аъзоларини ўзгача аташ имкониятини таклиф қилди. Унинг ўзи "TEPUBLICAN" ёки "TPUBLICAN" вариантларини ўртага ташлаган бўлса, ўғли кичик Доналд Трамп эса "Трампликачилар" (Trumplican) номини муносиб кўрди.
Маъқуллаш рейтинги пасаймоқда
Бу номлар ҳақидаги баҳслар Президентнинг маъқуллаш рейтинги лавозимига киришганидан бери муттасил тушиб бораётган бир пайтда юзага чиқди. The New York Times газетасининг ўртача ҳисоб-китобларига кўра, ҳозирда 41 фоиз америкаликлар Трампни қўллаб-қувватламоқда, 55 фоизи унинг сиёсатини маъқулламайди. Анъанавий равишда Республикачиларни қўллаб-қувватловчи Fox News телеканали ҳам Трампнинг обрўси тушиб кетганини қайд этмоқда.
MAGA ҳаракати ичидаги зиддият
Сўнгги ҳафталарда Трамп ўзининг "Make America Great Again" (MAGA) ҳаракатининг асосий вакиллари томонидан ҳам кўп бора норозиликларга учрамоқда. Ҳаракатнинг энг кўзга кўринган шахсларидан бири, конгрессмен Маржори Тейлор Грин миллиардер Жеффри Эпштейнга тегишли ҳужжатларни эълон қилишдан дастлаб бош тортгани учун Трамп билан кескин баҳсларга киришди.
Грин Конгрессни тарк этишини эълон қилиб, Оқ уйни давлат қарзининг ошиб бораётгани, иш ўринлари ноқонуний мигрантлар билан алмаштирилгани ва хорижий манфаатларни молиялаштириш каби масалаларда қайта танқид қилди. Шунингдек, унинг собиқ маслаҳатчиси Стив Бэннон Президентнинг "Америка биринчи ўринда" тамойилига зид равишда ташқи сиёсатга ҳаддан ташқари эътибор қаратаётганидан норозилик билдирган.
Тариф сиёсатига норозилик
Washington Post ва ABC томонидан ўтказилган сўров натижаларига кўра, Республикачиларнинг тўртдан бир қисми (25 фоизи) Трампнинг божхона тарифларига оид сиёсатини ёқламайди ва деярли ярми (47 фоизи) тарифлар инфляцияни кучайтиришини таъкидлаган. Бу ҳолатлар партия ичида сиёсий йўналиш борасидаги жиддий келишмовчиликларни кўрсатмоқда.