Япония ўзбеклар учун 250 та юқори ҳақли иш очди
Японияда ўзбекистонликлар учун янги имконият эшиклари очилмоқда. Миграция агентлиги ва Proud Partners компанияси ҳамкорлигида юртимиз фуқаролари учун 250 та етказиб берувчи ҳайдовчи ҳамда 150 та қурилиш йўналишидаги иш ўринлари таклиф этилмоқда. Номзодлар 1–2 декабрь кунлари Тошкентда ўтказиладиган танлов орқали саралаб олинади.
Ҳайдовчилар учун талаблар оддий: B ёки C тоифаси, 21–35 ёш ва хавфсизлик қоидаларига риоя қилиш. Қурилиш соҳаси ишчилари эса 18–35 ёшда бўлиши ва интизомга эга бўлиши керак.
Энг асосийси — иш берувчи 2000 доллардан бошланувчи маош, йилига икки марта бонус, турар жой, тиббий суғурта ва авиачипта харажатларини қоплашни ўз зиммасига олади. Япон ёки инглиз тилини билганлар эса алоҳида устунликка эга бўлади.
Қўшимча равишда, Ангренда бепул япон тили курслари очилиши режалаштирилган. Бу ташаббус юртимиз аҳолисини юқори маошли ва қонуний иш ўринларига йўналтириш бўйича амалга оширилаётган тизимли ишлар давоми бўлиб, хориждан келаётган маблағлар ҳажми ҳам ортиб бормоқда.