Рўзиқул Бердиев Элит ОЧЛда «Трактор»га қарши ўйин ҳақида нималар деди?
Элит ОЧЛнинг ҳал қилувчи 5-тур учрашуви арафасида «Насаф» клуби бош мураббийи Рўзиқул Бердиев ва тажрибали дарвозабон Абдувоҳид Неъматов матбуот анжумани ўтказди. Мутахассис жамоадаги мураккаб руҳий ҳолат ҳақида очиқ гапирди ва мухлисларга ғалаба ваъда қилди.
Бердиев: "Савия юқори, қийин тўқнашув кутмоқда"
Рўзиқул Бердиев дастлаб мусобақанинг умумий савияси ҳақида тўхталди: "Шуни алоҳида таъкидламоқчиманки, Элит ОЧЛда барча рақибларнинг даражаси юқори. Эртага бизни яна бир қийин тўқнашув кутиб турибди. Ўйлайманки, йигитларни ўйинга яхши тайёрлай олдик ва ижобий натижа (уч очко) қайд этишга ҳаракат қиламиз".
Дарвозабон Неъматов ҳам ўз навбатида жамоанинг ишончини билдирди: "Яхши жамоага қарши ўйнаймиз. Насиб қилса, мухлисларимизни хурсанд қиламиз ва уч очкони қўлга киритамиз".
«Трактор»нинг кучи — коллектив ўйин
«Трактор»нинг қолган рақиблардан фарқи ҳақидаги саволга жавоб бераркан, мураббий эронликларнинг жамоавий руҳияти юқорилигини таъкидлади: «Трактор»да номдор ўйинчилар (юлдуз футболчилар) сони озроқ бўлиши мумкин, аммо улар жамоа сифатида жуда кучли. Улар индивидуал маҳоратга эмас, коллектив ўйинга кўпроқ урғу берадиган рақиб.
Бош мураббий: "Қийинчиликларга ўзимиз айбдормиз"
«Насаф»нинг руҳий ҳолати ва жароҳатлар ҳақидаги энг кескин саволга Бердиев жуда очиқ-ойдин жавоб берди:
«Ҳозир биз мушкул босқични ўтказяпмиз. Жисмоний ва маънавий қийинчиликларга дуч келяпмиз, аммо бунга ўзимиз айбдормиз. Йигитларга ҳам буни тушунтирдим. Мухлислар олдида юзимиз ёруғ бўлиши учун, ғалаба қозонишга интиламиз. Баъзи бир футболчиларимизда енгил жароҳатлар бор, лекин эртага ҳар бир футболчи майдонда максимал ҳаракат қилади деган умиддаман. Ушбу мусобақада ҳали имкониятларимиз сақланиб қолган».
Дарвозабон Абдувоҳид Неъматов хавфни бир кишидан кутмаслигини, ҳар бир рақибга эътиборли бўлишини билдирди. Ундан юқори даражадаги ўйин кутиш мумкинми, деган саволга эса: «Насиб қилса, албатта», дея ваъда берди.
Эслатиб ўтамиз, «Насаф»нинг «Трактор»га қарши ҳал қилувчи учрашуви эртага 18:45 да бошланади.