د زعفرانو د ګل لسم ملي جشن په هرات کې ولمانځل شو
د طالبانو د حکومت د کرنې، اوبو لګولو او مالدارۍ وزارت د کرنې او مالدارۍ مرستیال وزیر مولوي صدراعظم عثماني د شنبې په ورځ په جشن کې وویل چې سږ کال په افغانستان کې په ۱۲۰۰۰ هکتاره ځمکه کې زعفران کرل شوي دي.
د وزارت لخوا په یوه خپره شوې اعلامیه کې، عثماني زیاته کړې چې ۴۱ ټنه زعفران تولید شوي دي، چې د تیرو کلونو په پرتله زیاتوالی ښیي.
له بلې خوا، د افغانستان د زعفرانو اتحادیې مشر حاجي ابراهیم عادل وايي چې تر اوسه پورې د زعفرانو په سکتور کې ۷۲ شرکتونه جوړ شوي او د دې محصول صادرات بهر ته دوام لري.
هغه وویل چې اتحادیه پلان لري چې په دې سکتور کې لس ملیونه ډالر پانګونه وکړي او ۸۰۰۰۰ کسانو ته دندې برابرې کړي.
دا په داسې حال کې ده چې د راپورونو له مخې، افغان زعفران په نړۍ کې غوره کیفیت لري.