Астанада қосалқы станция өртінен сол жағалаудың тұрғындары жарықсыз қалды
Астанада сол жағалаудың тұрғындары жарықсыз қалды, - деп хабарлайды Tengrinews.kz тілшісі.
Tengrinews.kz мәліметінше, апат салдарынан Сығанақ көшесіндегі "Жасыл квартал" тұрғын үй кешені, сондай-ақ "Самұрық-Қазына" мен "Қазатомөнеркәсіп" ұлттық компанияларының ғимараттары жарықсыз қалған. ТҮКШ басқарушы компаниясы электр энергиясының қаладан берілетін желі жағынан өшірілгенін мәлімдеді.
Төтенше жағдайлар министрлігінің баспасөз қызметі 22 қарашаға қараған түні Нұра ауданында, Сығанақ көшесінде трансформаторлық қосалқы станцияда кабельдің тұтанғанын хабарлады. Оқиға орнына келген өртсөндірушілер өртті сөндірді. Зардап шеккендер жоқ.
Түнде 109 iKomek қызметі "Тұран" қосалқы станцияда апатты ажырау болғанын хабарлады. Соның салдарынан мына мекенжайлардағы тұрғындар жарықсыз қалды:
"Жасыл квартал" ТҮК , Сығанақ көшесі (бұрынғы Е-10), үйлер: 17, 17п, 17р, 17с, 17н, 17л, 17е, 17в, 17д, 17г.
"Аура" ТҮК , Е-900 көшесі, 2-учаске.
"Асыл Мұра" ТҮК , Мұхамедханов көшесі, 4В, 4П, 4Г учаскелері.
Төлеби көшесі, 61, 65-үйлер.
Freedom ТҮК , Сығанақ көшесі, 15, 15/1.
GreenLine. Headliner Exclusive 1 ТҮК , Төлеби көшесі, 52.
Greenline Astra ТҮК , Е-900 көшесі, 10.
GreenLine. Flora 2 ТҮК , Е-900 көшесі, 6-үй.
Апат жұмыстары сенбіде таңғы сағат 5-те аяқтаймыз деп уәде етілген. Алайда бұл аудандардың тұрғындары әлі күнге дейін үйлерінде жарық пен жылудың жоғына шағымданып отыр.
Редакция "Астана-ӨЭК" компаниясына пікір сұрап жүгінді. Ондағылардың айтуынша, "Тұран" қосалқы станциясында сағат 01:06-да технологиялық ақау болып, РП-217-ні қоректендіретін №106 және №210 ұяшықтары ажырап қалған. Жедел бригадалар 01:09-да оқиға орнына жеткен. Барған кезде РП-217 жұмысындағы ақау расталды.
"Қазір РП-217-де электрмен жабдықтауды қалпына келтіру жұмыстары жүріп жатыр. Оған жедел-шығу қызметінің 3 бригадасы, сондай-ақ, Есіл ӨЭС-інің, сынақ және диагностика қызметі мен кабель желілері қызметінің бригадалары жұмылдырылды", – деп хабарлады "Астана-ӨЭК"-те.
Үйлердегі ең қажет мұқтажды қамтамасыз ету үшін дизель-генераторлық қондырғылар қосылған.
Сілтемесіз жаңалық оқисыз ба? Онда Telegram желісінде парақшамызға тіркеліңіз!