Эрон ОАВ: Ўзбекистонга гол уриш ҳам орзу бўлиб қолди
Ўзбекистон миллий терма жамоаси халқаро ўртоқлик турнири финалида Эрон билан беллашиб, драматик пенальтилар сериясида муносиб ғалабага эришгани ҳақида аввал хабар бергандик. Мазкур ўйиндан кейин Эрондаги қатор спорт каналлари ва нашрлар терма жамоамизнинг ўйинини юксак баҳолаб, ўзига хос меҳр билан фикр билдиришмоқда.
Маҳаллий Эрон каналларидан бири ўз шарҳида шундай дея таъкидлаган:
"Ўзбекистонни енгиш бир тараф, уларнинг дарвозасини ишғол қилишнинг ўзи ҳам энди орзуга айланиб бормоқда".
Бу фикрлар бежиз эмас. Чунки охирги икки ўзаро тўқнашувда ҳам Эрон терма жамоаси бизнинг дарвозамизга йўл топа олмади. Ўтган учрашувдаги 1:0 ҳисобидаги ғалаба ҳам айнан терма жамоамизнинг ишончли ҳимояси ва масъулиятли ўйини баҳосида қўлга киритилган эди. Бу галги финалда эса жамоамиз яна бир бор тартиб-интизом, кучли характер ва ментал бақувватликни намойиш этди.
Финалдаги ўйинда биринчи дақиқаларданоқ таркибимиз ўзини катта мусобақаларга тайёр эканини кўрсатди. Ҳар бир кураш, ҳар бир пас ва ҳар бир ҳаракатда ўйинчиларнинг иштиёқи сезилиб турди. Эроннинг юқори босимига қарамай, жамоа вазиятни назорат қилган ҳолда ўз дарвозасини ишонч билан ҳимоя қилди.
Пенальтилар сериясидаги қатъият эса алоҳида эътирофга лойиқ бўлди — футболчиларимиз бир зум ҳам иккиланмай, совуққонлик ва аниқ зарбалар билан ғалабани қўлга киритишди.
Эрон ОАВнинг бундай мулоҳазалари, аслида, терма жамоамизнинг сўнгги йиллардаги ўсиш суръати ва Каннаваро қўл остидаги тактик барқарорликка берилган эътирофдир.
Жамоамиз энди навбатдаги йиғинларга ҳам шундай руҳда тайёрланса, мухлисларимизни яна кўп қувончли лаҳзалар кутяпти, шубҳасиз.